Verse aus dem Gedichtband "Maryja S"

Вершы са збору “Марыя S.”

Віктар Сямашка, 18 красавiка 2007

дзе туман – там, здаецца,

сьвятлей

ПРА ЧАЎНЫ

ноч налілася поўна

напірае на вокны

чаўны грукочуць ля берага –

хвіліна сну

даражэй за золата

цеплыню коўдры

нічым не заменіш

твар у кожным люстэрку

розны

вочы як у падлетка

зразумелыя

чыстыя да зорнай бліскучасьці

за ўсё гатовыя –

пякучыя думкі

ноч наліпла на цела

Месяц сэрца

прышчапіў

Вечарніца з вока ў вока

пераплывае, і чаўны

ля берага…

***

захад запальвае

лямпачкі ў кватэрах

– дамы-актопусы на вочы багатыя

прыпынкі для гіпапатамусаў

знакі для бронзавых насарогаў

правады для камароў,

што сьлізгаюць

сьпінамі ўніз

НЕБАРАКА

У касьцёл, калі ні прыйду –

заўсёды на імшу трапляю

гэтым разам не захацеў прычасьце браць,

бо не спавядаўся

ніколі не спавядаўся

пайшоў да выхаду,

калі ўсе ўжо на калені ўсталі

засаромеўся

алтару не пакланіўся –

а ля выхаду

ўжо чорт чакае

…вух!!!…